हे बघ भावा...इंतजार की घडिया खतम! आपल्या सर्वांच्या लाडक्या गणपती बाप्पाच्या आगमनाला मोजून फकस्त चारच दिस उरल्याती. चर्चा तर होणारच. फुल्ल जोशाच वातावरण हाय सगळीकडं, गावात तर नुसता दंगा, योट हाय. असायला बी पाहिजेच की माझा बाप्पा यायलाय, जल्लोष तर होणारच. यंदाच् वरीस आमच्या मंडळाचं 25 वा वरीस हाय. ते रोप्य का काय ते म्हणत्यात कि नाय तसलं वरीस हाय त्यामुळं यंदा रुबाब फकस्त आमचा अन आमच्या बाप्पाचा. यंदाचं वरीस आमच्यासाठनं लई इम्पोरटंट असल्यानं अध्यक्षपदासाठनं बी लई इच्छुक हुत. परतेकला अध्यक्ष व्हावं वाटत हुत कारण आमचं मंडळ बी तसं नादखुळा अन गावात वट असणार हाय नव्ह. गावाचं युवा नेतृत्व, गावातलं बुलेट किंग संग्राम भाऊ जवा यात उतरलं तसं बाकी आंडु-पांडू गपगार कोपऱ्यात बसलं. त्यामुळं यंदाच्या पंचीसाव्या वर्षिचं मंडळाचं अध्यक्ष संग्राम भाऊच.
संग्राम भाऊ म्हंजी मोठी असामी, भाऊंच्या नुसत्या हाकेवर शंभर भर पोरं जमा हुत्यात. यंदा भाऊ मंडळाला चार चाँद लावणारच. भाऊंच्या नेतृत्वाखाली आमी गणपती ठरवाया सांगली, वडगाव अन पार कोलापूर पालतं घातलं पण भाऊसनी काय मनासारखं मूर्ती भेटना. त्यात आमचं शिकलेलं 'पम्या' म्हण मूर्ती 5-6 फुटाची घ्याची ते पर्यावरणाची हानी बिनी हुतीय म्हण. तेच्या वरून मोठा वाद झालत्याला पंचीसाव वरीस अन बारकी मूर्ती अजिबात जमणार नाय. सगळं कार्यकर्त नाराज झालत्यालं. कमीत कमी 15-16 फुटाची तरी मूर्ती आणावं म्हणून सगळ्यांनी हट धरल्याला. शेवटाला भाऊंनी तोडगा काडत कराडला 12 फुटाची एकदम देखणी मूर्ती फायनल केली. मूर्तीसाठनं भाऊंनी सरपंचाना तयार केलयं. निवडणुका तोंडावर असल्यानं सरपंच बी लगेच तयार झालत.
यंदा तुफान जल्लोष असल्यानं वर्गणी बी धडाक्यात गोळा करायची चालू हाय. ' बजेट किती बी असू दे खर्च आमी आमच्या पद्धतीनं करणार'. वर्गणी साठनं आमच्या मंडळाच्या इलाख्यातली कुळ बाजूला काडल्याती. कुणाकडं हजार, कुणाकडं पाचशे, कुणाकडं शंभर घ्याच याच जंगी नियोजन खजिनदारानं केलंय. वर्गणीसाठनं भन्नाट आयडिया काडल्याती. आमचं 'बंड्या' तर ' तुम मुझे वर्गणी दो मैं तुम्हे पावती दुगा' ची घोषणा सुरु केलीय.
आमच्या मंडळाचा महाप्रसाद म्हंजी आख्या गावात चुलबंदी असतीया. अख्खा गाव जमतंय आमच्या बाप्पाच्या प्रसादला यंदा बी सुट्टी नाय.
मंडपाची तयारी बी एकदम आवरत आलीय. आतलं डेकोरेशन एकदम झकास झालंय. लायटिंग एकदम झ्याक-प्याक केलीया. मंडपापासन चार बी बाजूला लाईटच्या माळा सोडल्याती. मंडळाचा चौक एकदम दिवाळी असल्यावाणी वाटतुया. रस्त्यावर कार्यकर्त्यांच्या फोटुच्या कमानी बी लावल्याती.
मनोरंजनासाठनं बी मंडळाच्या कार्यकर्त्यांनी धमाल नाटकाची जुळणी घातलीया. वरच्या गल्लीचं 'आज्या' त्याच डायरेक्टर हाय तेचि बी तालीम चालू हाय.
अध्यक्ष परवा तालुक्याला गेलत्याल ते काय मंडळाची मिटिंग हुती म्हण. आल्यापासनं डॉल्बी आणायचं नाय म्हणत्यात तेच्या मूळ निम्या कार्यकर्त्यांचा उल्लास गेलाय. भाऊ म्हणत्यात मिरुवणुकीला झांज अन ढोलताशा पतक आणुया. पण पोरं म्हणत्यात झांज अन ढोलावर नागीण डान्स कसा कराचा. अन शांताबाई, आवाज वाढवा डीजे तुला..., सोनू... ही गाणी कवा वाजवायची. पण भाऊ म्हणत्यात काहीतरी पाईट असलं म्हणून यंदा मिरवणुक झांज, ढोल ताशावरच असणार. " हक्काने वाजवतो अन बाप्पाला नाचवतो, ढोल पण वाजणार अन पोरं बी नाचणार"
कार्यकर्त्यांनी तर शाळा, कालेज, अन कामाला दांड्या मारायला सुरुवात केलीया. मागच्या गल्लीचं 'गोट्या' काम सोडून मंडळात असतंय म्हणून रंजना काकू काल वरडत आलंती.
ही सगळी तयारी बाप्पाची. वर्षातन एकदाच येणाऱ्या लाडक्या सणाचा जल्लोष बी तसाच जोरात असणार. त्यामुळं तयारी युद्ध पातळीवर सुरु हाय. बारक्या पोरापासनं मोठ्या पर्यंत सगळ्यांच्या डोक्यावर सध्या हाच विषय हाय. बाप्पा हायच लाडका सगळ्याचा. तुमची तयारी आवरत आली असलंच. तुम्हा सर्वासनी लाडक्या सणाच्या शुभेच्छा...
बाप्पा तुझ्याशिवाय आम्ही शुन्य
आमी तुझे सेवक हेच आमचं पुण्य.
#गावाकडची हवा
No comments:
Post a Comment