बाबुराव आणि सोनूची धूम

भावांनो मोरया.....विघ्नहर्ता, सुखकर्ता, बुद्धीचा अधिपती बाप्पा आपल्या घरी येऊन बघता बघता 11 दिवस होत आले,  आणि उद्या बाप्पा निघाले सुद्धा. गणपती आल्यानंतर साराच मौहोल कसा गजबजल्यासारखा होता. आणि आता बाप्पाला निरोप देताना मात्र मन उदास आहे.  घरगुती गणपतीनंतर उद्या मंडळाचे गणपती जाणार म्हणजे एकदम उदासी. एकदम मोकळं आणि सर्वत्र सन्नाटा.
          पण दोस्तांनो अजून उद्याचा दिवस शिल्लक आहेच की  बाप्पाचे आगमन, स्वागत व त्यानंतर चे टॉप चे काम म्हणजे बाप्पाची विसर्जन मिरवणूक. त्यामुळे ही मिरवणूक लक्षात राहण्यासारखी करण्यासाठी कार्यकर्ते फुल्ल जोशात आहेत. या वर्षी डॉल्बीला विरोध असल्यामुळे बहुसंख्य मंडळांनी पारंपरिक वाद्य ढोल, ताशा, लेझीम, झांज यावर भर दिला आहे. तरीही मिरवणूक स्पीकर आणि गाण्याशिवाय पूर्णच होत नाही. मंडळातील 8 वी-9 वी ची पोरं विचारत्यात " अध्यक्ष ढोलावर नाचायच कसं? गाणी पाहिजेतच की". त्यामुळे पारंपरिक वाद्यांबरोबर स्पीकर आणि गाणी असणार ही काळ्या दगडावरची रेख.
           बरं फक्त स्पीकर नाहीतर कार्यकर्त्यांची गाण्याची लिस्ट पण तयार आहे. विसर्जन मिरवणूक म्हंटले की काही विशिष्ट गाण्यांना प्रचंड मागणी असते. उडत्या चालीच्या गाण्यावर बेफाम होऊन नाचणारा एक गट प्रत्येक मंडळात असतोच. प्रत्येक वर्षी अशा खास ' फर्माइशी' गाण्यांनी मिरवणुकीत धमाल उडवून दिली आहे.
            यावर्षी 'सोनू तुला माझ्यावर भरोसा नाय काय?' हे फार्मात आहे. सगळ्या शब्दात आणि भाषेत गाण्याची क्रेझ आहे. त्याचबरोबर मोनू अजमेरी याचं या वार्षिचं फेमस गाणं 'आला बाबुराव' जोर धरू लागले आहे. याबरोबर प्रदीप कांबळे याचं 'सुया घे, पोत घे' हे गाणं ही भाव खाते. संजय लोंढेच 'शांताबाई' तर तुफान गाजलं होते त्याचा करिश्मा अजूनही कायम आहे. या वर्षी नवीन आलेले साजन बेंद्रे याचे ' पोरगं माझं गुणांचं, वाजव ढंगळांग टकळांग', गेल्या वर्षीचे गजानन पाचेगावकरचं ' मी तुझा परशा, तू माझी आरची' ही गाणी अजून पोराच्या तोंडात आहेत.
            या गाण्यासोबत ' अरे आपला भाऊ', वाट बघतोय रिक्षावाला', 'पारू नाच', 'आवाज वाढवा डीजे तुला', 'चिमणी उडाली भुर्र', 'डॉल्बीवाल्या बोलवं', 'बेबी ब्रिगीट ऑन', 'बानू बया', 'तुझ्या रुपात चांदणं पडलंय', 'जीव झाला येडा पिसा', 'चारशे चाळीस करंट माझा', 'बाई वाड्यावर या' यासारख्या मराठी गावरान तडखा जोरात आहे.
            'मैं हू डॉन', 'आ देखे जरा', 'नायक नही खलनायक हू मैं', 'सपने मे मिलती है', 'बिलनची नागीण निघाली', 'मी बाबुराव बोलतोय', 'दाजीबा', 'डोकं फिरलंया', 'कोंबडी पळाली', 'मुंगळा' ही ऑल टाइम फेव्हरेट गाणी लिस्टमध्ये टॉपवर आहेत.
         अजय-अतुल स्पेशल आणि सैराट ची गाणी विशेषतः झिंगाट आजही  ताल धरायला लावतात. अशा गाण्याची मागणी गणपती डान्सर कडून हट्टाने होते.
          संगीत कंपन्यांकडून सणाच्या मौक्यावर चौका मारत नवीन गाणी लॉन्च केली जातात. उद्याच्या मिरवणुकीत अजूनही नवी कोरी गाणी येतील. यंदाच्या मिरवणूकीत झक्कास गाणी वाजवा, त्यावर ताल धरा, भरपूर नाचा.
       "काय रे पोरांनो, कसली गाणी होती काल" असे कोणी दुसऱ्या दिवशी म्हंटले की समजा तुमची मिरवणूक झक्कास झाली आहे.
बाकी गणपती बाप्पा मोरया पुढच्या वर्षी लवकर या!