मॉकटेलस्

हाय फ्रेंड्स, व्हाट्स अप... सगळे ओके आहे ना?  हा उन्हाळा जरा जास्तच तापला आहे म्हणून विचारले. बाकी परीक्षा, सुट्टीतील नियोजन, ट्रिप, समर कॅम्प आणि बरचं काही सुरू असेल किंवा सुरू होईल. पण उकाड्याने आणि घामाच्या धारांनी जिवाची घालमेल करून टाकली आहे. घरचे तर त्यावर अत्याचार करत आहेत. सकाळी झोपेतून उठविण्यासाठी आता हाक मारत नाहीत डायरेक्ट पंखाच बंद करतात राव, मग काय झोप त्याच क्षणाला उडून जाते.
        या वर्षी उन्हाळा जास्तच आहे असे दरवर्षी वाटते आणि ते खरे ही आहे तापमापीचा पारा यंदा 43 अंश सेल्सिअसपर्यंत पोहोचून आला आहे. अशा तपती गर्मीत शरीराला कूल ठेवण्यासाठी  आपण वेगवेगळे फंडे आजमावत असतो. यावर्षीही त्यात कमी नसणार हे नक्की. पोहायला जाणे, आईस्क्रीम, ज्यूस, सरबत, कोकम, ताक, लस्सी, कलिंगड, कैरीचे पन्हे यासारखे नेहमीचे उपाय आपण सुरु केले असतील. यातून शरीराला व मनाला थोडा गारवा नक्कीच मिळतो.
      गेल्या आठवड्यात उन्हापासून बचाव म्हणून झाडाच्या सावलीत गॅंग च्या गप्पा सुरु होत्या तोपर्यंत 'परश्या' उन्हातून धापा टाकत आला. " काय यार लईच उन्ह आहे या वर्षी". त्यावर "तर-तर जस काय गेल्या वर्षीच्या उन्हाळ्यात स्विझरलँडलाच होतास." म्हणत 'सच्यानं' गुगली टाकली. परश्याला उन्हा बरोबर अपमानाचा मोठा तडाखा बसला. यावर परिस्थिती निवळण्यासाठी राहुल्या सर्वाना थंड देण्यासाठी घेऊन गेला. नवीन ठिकाणी  थंड पेय मॉकटेलस्...
       मॉकटेलस्,! ट्राय केलाय ना हा प्रकार. नक्कीच केला असेल. काही वेगळे नाही पण नाविण्य आहे. ८० च्या दशकात कॉकटेल नावाचा प्रकार फार प्रसिद्ध होता त्याचंच नवीन व्हर्जन म्हणजे मॉकटेलस्. वेगवेगळ्या चवीचे, वेगवेगळ्या फळांचे ज्यूस, सिरप, क्रीम यांचा एकत्रित प्रकार आपण यात अनुभवतो.ज्या प्रमाणे आपण इतर सॉफ्ट ड्रिंक्स चा आस्वाद घेतो त्यातीलच हा प्रकार. ऑरेंज, मँगो, लेमन, जिरा,  पाईनअँपल, कोकम अशा अनेक प्रकारांनी नटलेली हि ड्रिंक्स सध्या तरुणाईच्या पसंतीला उतरत आहेत. शहरात वेगवेगळ्या कॅफे मध्ये, स्पेशल ज्यूस सेंटर, आईस्क्रिम पार्लर मध्ये मॉकटेलस् व्हरायटीमध्ये आपल्याला उपलब्ध होतात. मिनी पार्टीसाठी तरुणाईची सध्या हि पहिली चॉईस आहे. स्टाईल स्टेटमेंट प्लस गारवा दोन्हीही उद्देश यातून साध्य होताना दिसतात. याशिवाय रस्त्याच्या कडेला असणाऱ्या सोडा मिक्स सरबत त्यांच्या नवीन आलेल्या गाड्यावर तरुणाईची गर्दी पाहायला मिळते.
        आपल्याकडील तापमान बघता सूर्यदेव यंदा वर्षाचं टार्गेट मे महिन्यातच पूर्ण करणार असे दिसतेय. बाकी उन्हाळा कितीही कडक असला तरी काळजी घ्या आणि मगच सुट्टी एन्जॉय करा. कारण प्रत्येक ऋतूचा आनंद हा वेगळाच असतो. हॅप्पी समर!
-------------------------------------------------------------------
संदीप